माओवादी हे राष्ट्रपति जूगु जूसा
वास्तवय् माओवादीं एमाले नेता माधव नेपालयात धोका हे बियाः जूसां रामराजाप्रसाद सिंहयात राष्ट्रपति दयेकेगु लागिं छाय् कुतः यात धइगु खँ आः वयाः पुष्टि जूगु दु । सहयोगी वाःपौ 'जनआस्था'या संपादक किशोर श्रेष्ठं उकिया विश्लेषण यासें धयादी 'थौं रामवरणया थासय् रामराजा राष्ट्रपति जूगु जूसा सेनापति पदय् माओवादीया थःहे मनू कुलबहादुर खड्का वयेधुंकल जुइ । अथे हे प्रधानन्यायाधीशय् नं मिनबहादुरया थासय् खिलराजयात हयेधुंकल जुइ । थुकथं सेना न्यायालय, सरकार, क्यान्टोनमेन्ट, सतक, सदन फुकभनं माओवादीया माओवादी जक जुइबलय् उमिसं धाःगु राज्य कब्जा अथें हे जू वनीगु खः ।' माओवादीया राज्यसत्ता कब्जा यायेगु रणनीति आः प्रचारय् वःगु टेपपाखें नं पुष्टि जूगु खँ नं वय्कलं धयादिल ।
