बुद्ध जयन्तीइ राष्ट्रपति झाइगु
२५५३ क्वःगु बुद्ध जयन्ती मूल समारोहय् गणतान्त्रिक नेपाःया न्हापांम्ह राष्ट्रपति डा. रामवरण यादव न्हापांखुसी आनन्दकटी विहारय् जुइगु मूल समारोहय् झाइगु जूगु दु । प्यदँय् छक्वः राष्ट्रप्रमुख स्वयम्भुइ जुइगु मूल समारोहय् वइगु परम्परा कथं थुगुसी वय्कः समारोहय् सहभागी जुइगु क्वःछिउगु खः । म्हिगः रिपोर्टस्र क्लबय् बुद्ध जयन्ती मूल समारोह समितिं ग्वसाः ग्वःगु पत्रकार सम्मेलनय् प्रचार प्रसार समितिया संयोजक भिक्षु संघरक्षितं उगु खँया जानकारी बियाबिज्याःगु खः ।
नापं थुगुसी प्यदँय् छक्वः जुइगु अस्थिधातु ब्वज्या नं जुइत्यंगु दु । बुद्ध जयन्तीया लसताय् अस्थिधातु ब्वज्या व थीथी ज्याझ्वः जुइगु खँ लक्ष्मीदास मानन्धर व प्रा. सुवर्ण शाक्यं पत्रकार सम्मेलनय् कनादिल ।
