कांग्रेस व एमालें थःगु अडान त्वःतल, सरकारया नेतृत्व खुला
सत्तारुढ नेकपा (एमाले) व नेपाली कांग्रेसं एकीकृत नेकपा (माओवादी)या नेतृत्वया सरकार स्वीकार मयायेगु धकाः कयाच्वंगु अडान त्वःतुगु दु । निगू दलं थुगु अडान त्वःतेवं स्वंगू दलत सहमति नापसं थ्यंगु खँ धाःगु दु ।
सिंहदरवार स्थित शान्ति मन्त्रालयलय् च्वंगु स्वंगू दलया मुँज्याय् कांग्रेस व एमालें सरकारया नेतृत्वया बारे खुला जुया सहलह यायेफइगु खँ धाःगु खः । मुँज्या लिपा कांग्रेस संसदीय दलया नेता रामचन्द्र पौडेल व एमाले नेता केपी शर्मा ओलीं सरकारया नेतृत्वय् थःपिं खुला जुया सहलह यायेगु सहमति जूगु धयादिल ।
थ्वस्वयां न्ह्यः सत्तारुढ निगू दलं माओवादी निशस्त्र मजुइकं वया नेतृत्वय् गठन जुइगु सरकार स्वीकार मयायेगु अडान कयाच्वंगु खः । कन्हय् छगू विशेष ज्याझ्वःया दथुइ माओवादी लडाकुयात मन्त्रिपरिषद मार्फत हयेत्यंगु दु । वयां लिपा माओवादीया लडाकू व ल्वाभः सरकारया मार्फत वइ ।
स्वंगू दल सहमति नापसं थ्यनेवं सरकार गठन यायेगु ई थप यायेत राष्ट्रपतियात इनाप यायेगु निर्णय उगु मुँज्यां याःगु दु । राष्ट्रपति डा. रामवरण यादवं सहमतिय सरकार गठन यायेत दलतय्त ब्यूगु ई थौं क्वचायेत्यंगु दु । सहमतिय सरकार गठन यायेगु ई थप यायेत राष्ट्रपतियात इनाप यायेगु विषयलय् नीच्यागू दलया मुँज्या थौं हे च्वनीगु ज्याझ्वः दु ।
