सहमति मजूसा पुलांगु हे नियमावली कथं चुनाव
प्रधानमन्त्रीया निर्वाचन सम्बन्धि नियम संशोधन यायेत मू स्वंगू दल थौं नं ताःमलाःसा पुलांगु हे नियमकथं निर्वाचन जुइगु जूगु दु ।
व्यवस्थापिका संसदया कार्यसञ्चालन नियमावलीइ दुगु नियम संशोधन यायेत वंगु पुस २९ गतेया संसद मुँज्यां नियमावली संशोधन मस्यौदा समिति नीस्वंगु खः । छक्वःपतिकं च्वंगु मस्यौदा समितिया मुँज्यां नं सहमति यायेमफयेवं थुगु विषयसं मू स्वंगू दलदथुइ थौं हाकनं सहलह जुइत्यंगु दु ।
राष्ट्रपति डा. रामबरण यादवं संविधानया धारा ३८ या उपधारा १ कथं थौंतक्कया नितिं सहमतीय सरकार दयेकेब्यूगु समायावधी नं क्वचायेत्यंगु दु । थौं सनिलतक्कयादुने नियमावली संशोधनया नितिं सहमति यायेमाःगु वा राष्ट्रपति दथुइ सहमतिया नितिं दलतय्सं हाकनं ई माग यायेमाःगु अवस्था दु । मखुसा अन्तरिम संविधानया धारा ३८ या उपधारा २ कथं थौं हे राष्ट्रपति यादवं बहुमतीय आधारय् सरकार नीस्वनेगु नितिं इनाप यायेगु श्रोतया धापू दु ।
राष्ट्रपतिपाखें बहुमतीय सरकारया निंतिं इनाप याःसां पुलांगु हे नियमावली कथं प्रधानमन्त्री निर्वाचन यायेगुया विकल्प मदइगु संसद सचिवालय श्रोतया दावी दु । संसदया मुँज्याय् न्ह्यःब्वइगु छु नं प्रस्ताव निर्णयार्थ न्ह्यब्वयाः तटस्थ च्वने मदइकथं सर्वोच्च अदालतं छुं ई न्ह्यः याःगु निर्देशनं प्रधानमन्त्री ल्ययेगु नितिं सहज लकस दयेकूसां नं नियमावली संशोधनय् दलत दथुइ सहमति जुइमफयाः प्रधानमन्त्री निर्वाचनया प्रक्रियाय् अझ नं अन्यौलता दनि ।
