मंकाः संघर्ष समितिइ हाकनं झिगू घटक
येँ (सन्ध्या टाइम्स)/संघीय लोकतान्त्रिक गणतन्त्र नेपाःया न्हूगु संविधानय् नेवाः स्वायत्त राज्य सुनिश्चितताया नितिं आन्दोलन याना वयाच्वंगु नेवाः स्वायत्त राज्य मंकाः संघर्ष समितिइ यलया बौद्ध विहार संघ नं दुथ्याःगु दु ।
थौं सुथय् च्वंगु नेवाः स्वायत्त राज्य मंकाः संघर्ष समितिया बैठकं यलया बौद्ध विहार संघयात नं छगू घटकया रुपय् दुथ्याकेगु धकाः खँ क्वःछिउगु खः।
बौद्ध विहार संघ यल संघर्ष समितिया घटक जुइवं आवंलि यलया जक हे निगू घटक दुथ्याःगु दु। थ्व सिबें न्ह्यः ज्यापु समाज यल नं दुथ्यानाच्वंगु दु ।
मुक्कं यानाः आः झिगू घटक जूगु मंकाः संघर्ष समितिइ एकीकृत नेवाः राष्ट्रिय मुक्ति मोर्चा, नेपाः लोकतान्त्रिक नेवाः संघ, लोकतान्त्रिक नेवाः दबू, नेवाः ल्याय्म्ह न्ह्यलुवा, नेवाः देय् दबू, नेवाः देय् गुथि नेपाल मण्डल, ज्यापु महागुथि, नेवाः जागरण मञ्च दुथ्यानाच्वंगु दु।
थ्व सिबें न्ह्यः नं मंकाः संघर्ष समितिइ झिगू घटक हे जुयाच्वंगु खः। झिगू घटक मध्ये छगू नेवाः मुक्ति मंकाः दबू जुयाच्वंगु खःसा छुं दिं न्ह्यः जक नेवाः मुक्ति मंकाः दबू व नेवाः राष्ट्रिय मुक्ति मोर्चा एकीकरण जुयाः एकीकृत नेवाः राष्ट्रिय मुक्ति मोर्चा जुयाः मंकाः संघर्ष समितिइ गुंगू जक घटक जूगु खःसा आः हाकनं बौद्ध विहार यल दुथ्यायेवं मंकाः संघर्ष समितिइ झिगू हे घटक जूगु दु ।
