स्वम्हेसिनं न्ववानाः क्वचाःगु पोलिटब्यूरो बैठक
येँ (सन्ध्या टाइम्स)/एकीकृत माओवादी दुने फरक मतयात कार्यकर्ता प्रशिक्षणय् यंकेगु/मयंकेगु धइगु विषययात कयाः पिहां वःगु विवाद ज्यंकेत म्हिगः च्वंगु पोलिटब्यूरो बैठक स्वम्ह शीर्ष नेतातय्सं न्ववानाः क्वचाःगु दु ।
पार्टीया केन्द्रीय ज्याकू पेरिस डाँडाय् म्हिगः सुथय् ११ बजेनिसें न्ह्याइ धाःगु उगु बैठक १२ बजेनिसें साढे १ घण्टा तक न्ह्यानाः क्वचाःगु खः ।
बैठकय् पार्टीया अध्यक्ष प्रचण्डं प्रशिक्षणयात उपाध्यक्ष डा. बाबुराम भट्टराईं थुइकूगुली गलत जूगु नापं प्रशिक्षण ज्याझ्वः बहिष्कार याःगु नापं बाबुराम पक्षधरय्सं भचा गोलमाल याःगु खँ न्ह्यथनादीगु खःसा उकियात कयाः भट्टराईनं स्पष्टीकरण बीगु नापं अभिब्यत्तिइ स्वतन्त्रता व फरक मत प्रशिक्षणय् यंकेमाः धकाः न्ववानादीगु खः।
स्रोतं बिउगु जानकारी कथं अध्यक्ष प्रचण्डं बाघौ न्ववानादीगु खःसा उपाध्यक्ष भट्टराईनं १५/२० मिनेट व मेम्ह उपाध्यक्ष मोहन बैद्यं २ मिनेट न्ववानाः केन्द्रीय कमिटीइ सहलह यायेगु सहमति याःगु खः। माओवादीया विवादयात कयाः थौं केन्द्रीय कमिटीया बैठक जुयाच्वंगु दु। थौंया बैठक नं केन्द्रीय ज्याकुथिइ हे जुयाच्वंगु खः ।
