लिम्बुवानी नेतातय् इनाप
येँ (सन्ध्या टाइम्स)/हंगकंग व मकाउ तःदँ तक मेगु देय्या भूभाग जुयाच्वंसां लिपा हानं चीनया हे मूल भूमिइ स्वाः वः थें थौंकन्हय् लिम्बुवानपाखें अलग जुयाच्वंगु संखुवासभाया भूभागत नं आः लिम्बुवानय् हे तये हये माःगु माग संघीय लिम्बुवान राज्य परिषदया नेतातय्सं याःगु दु ।
लिम्बुवानया भूभाग खयां नं संविधानसभाया न्हूगु नक्साय् लिम्बुवानपाखें छुटे यानाः क्यनातःगु अरुण पूर्वया थीथी लागाय् आमसभा याः वनाच्वंगु उगु परिषद्या दुजःतय्सं थ्व माग याःगु खः। संखुवासभाया थीथी लागाय् जूगु आमसभाय् न्ववासें परिषद्या नायः कुमार लिङ्देन 'मिराकं' लिम्बुवानया अस्तित्व दुगु संखुवासभा लागायात स्वंगू कुचा याःगु खँय् आपत्ति प्वंकुसें थ्व लागायात लिम्बुवानय् हे तयेमाः धकाः स्थानीय जनतां नं सः तयेत इनाप यानादिल। वय्कलं इतिहास थुकिया साक्षी दुगुलिं हंगकंग व मकाउ मूल भूमिइ लिहां वःथें थ्व लागा नं लिहां वयेमाःगु बिचाः प्वंकादिल ।
