मधेशी नेतातय्त ब्यलि
येँ (सन्ध्या टाइम्स)/नेपालय् न्हूम्ह प्रधानमन्त्री ल्ययेगु न्हूगु चरण शुरु जुइगु इलय् लाक्क नेपाः थ्यंकः वःम्ह भारतीय विदेश सचिव निरुपमा रावं म्हिगः थनया मधेशवादी दलया नेतातय्त जकः सःताः ब्यलि भ्वय् नकादिल ।
थ्व स्वयां न्ह्यः प्रधानमन्त्रीया चुनाव जुइगु इलय् लाक्क हे नेपाः वःम्ह भारतया विशेष दूत श्याम शरणं नं मधेशवादी पार्टीया नेतातय्त जक सःताः ब्यलि भ्वय् नका थकूगु खःसा उगु भ्वय् लिपा हे मधेशी मोर्चायात हानं म्वाकाः प्रम चुनावय् मधेशवादी दलत तटस्थ च्वनेगु धकाः निर्णय याःगु खः। आः नं प्रधानमन्त्री ल्ययेगु लागिं न्हूगु चरणया चुनाव जुइगु इलय् लाक्क वयाः विदेश सचिव रावं मधेशवादी दलतय्त व्यलि भ्वय् नकादीगुलिं प्रमया चुनाव हानं नं अवरुद्ध जुइगु सम्भावना ब्वलंगु खँ थन सूत्रं धाःगु दु ।
विदेश सचिव राव म्हिगः नं थीथी नेतात नापलायेगु ज्याय् न्हिछि हे व्यस्त जुयादीगु खः ।
