झिन्हुया दुने सरकार : एमाले नायः खनाल
नेकपा (एमाले)या नायः झलनाथ खनालं झिन्हुया दुने देशं न्हूगु सरकार दयेकीगु खँ धयादीगु दु । विराटनगर विमानस्थलय् थौं सञ्चारकःमिपिंलिसे खँल्हाबल्हा यानादिसें नायः खनालं सहमति मजूसा बहुमतीय प्रणालीपाखें हे जूसां नं देशं याकनं हे न्हूगु सरकार दइगु दाबी यानादिल ।
शान्ति व संविधानया सुनिश्चितताया निंतिं सहमतीय सरकार स्वयां उत्तम मेगू विकल्प मदइगु न्ह्यथनादिसें वय्कलं बहुमतीय प्रणाली निगूगु विकल्प जक जूगु धयादिल । वय्कलं सहमतिया सरकारया पक्षय् एमाले दुगु जूसां नं अज्याःगु अवस्था मवःसा देय्यात सरकारविहीन मदयेकेत बहुमतीय प्राणालीइ नापं वनेफूगु न्ह्यथनादिल ।
सहमतीय सरकार निर्माणया नितिं स्वंगू दल गम्भीर दुगुलिं देशं सहमतीय सरकार दइगु अपेक्षा तसें नायः खनालं लिपांगु इलय् सहमति जुइगु विश्वास प्वंकादिल । सहमति मजूसा दयेकीगु बहुमतीय सरकारं नं शान्ति व संविधानयात प्राथमिकताय् तयाः ज्या यायेमाःगु वय्कःया धापू खः । सहमतीय सरकारया नेतृत्व बारे न्यंगु न्ह्यसलय् धाःसा नायः खनालं छु नं प्रतिक्रिया बियामदी ।
