माओवादी केन्द्रीय समिति मुँज्या बहनी तक्क न्ह्याइगु
कार्यकर्ता प्रशिक्षणया झ्वलय् खनेदुगु आन्तरिक विवाद मिलय् यायेत च्वंगु एकीकृत नेकपा (माओवादी)या केन्द्रीय समितिया मुँज्या आःतक्क नं न्ह्यानाच्वंगु दु । पार्टी केन्द्रीय ज्याकू कोटेश्वर पेरिसडाँडाय् न्याघौ न्ह्यःनिसें न्ह्यानाच्वंगु मुँज्याय् कार्यदिशा थुइकेगुलिइ एकरुपता हयेत कुतः जुयाच्वंगु माओवादीं जानकारी ब्यूगु दु ।
मुँज्याया दथुइ हे पिहांवनादीम्ह प्रवक्ता दीनानाथ शर्मां आन्तरिक संगठनात्मक समस्याया विषयस सहलह जुयाच्वंगु जानकारी पत्रकारतय्त बियादिल । न्वकु डा. बाबुराम भट्टराईया व्यागलं मतयात गुकथं क्वय् तक्क यंकेगु धइगु विधि बारे सहलह जुयाच्वंगु वय्कलं धयादिल ।
न्हिनय् छताः इलंनिसें न्ह्याःगु मुँज्याय् दुजःतय्सं बिचाः तयेगु ज्या न्ह्यानाच्वंगु दु । प्रवक्ता शर्माया कथं नायः पुष्पकमल दाहाल 'प्रचण्ड', न्वकुपिं मोहन वैद्य 'किरण' व डा. बाबुराम भट्टराईलिसे गुम्ह स्थायी समिति दुजः व न्ह्यम्ह पोलिटब्युरो दुजलं थःथःगु बिचाः तयादीधुंकूगु दु ।
थःगु ब्यागलं मतयात पार्टीया आन्तरिक प्रशिक्षणय् ब्वनेदयेमाःगु न्वकु डा. बाबुराम भट्टराईया अडान लिपा निगू प्रशिक्षण ज्याझ्वः स्थगित यासें माओवादीं विवाद समाधान यायेत केन्द्रीय समिति मुँज्या सःतूगु खः । उगु हे विषयस थ्व स्वयाः न्ह्यः स्थायी व पोलिटव्युरो मुँज्याय् नं सहलह जूगु खः ।
