न्यायाधीस बमयात कारवाहीया तयारी
महाभियोग तयेत स्वंगू दल सहमत
येँ (सन्ध्या टाइम्स)/सवार्वेच अदालतया न्यायाधीश रणबहादुर बमयात कारवाही यायेगु निंतिं महाभियोग लगे यायेत एकीकृत माओवादी, नेपाली कांग्रेस व एमालेया नेतात सहमत जूगु दु ।
न्याय परिषदं भ्रष्टाचार याःगु द्वपनय् न्यायाधीश बम विरुद्ध महाभियोग तयेत सिफारिस याःगु खः। सिंहदरवारय् थौं सुथय् स्वंगू दलया बैठकलिपा माओवादीया प्रमुख सचेतक पोष्टबहादुर बोगटीं न्यायाधीस बमयात भ्रष्टाचारया महाभियोग तयेगु खँय् सहमति जूगु जानकारी बियादीगु खः ।
महाभियोगया प्रस्ताव सभामुख सुवासचन्द्र नेम्वाङं संसदय् सुनुवाई यायेधुंकाः संसदया दुई तिहाई बहमतं पारित जुइवं बमयात महाभियोग लगे जुइगु प्रावधान दु।
थौंसुथय् च्वंगु स्वंगू दलया उगु बैठकय् माओवादी अध्यक्ष प्रचण्ड, नेपाली कांग्रेस संसदीय दलया नेता रामचन्द्र पौडेल, नेकपा (एमाले)या अध्यक्ष झलनाथ खनाल नापं स्वंगुलिं हे दलया प्रमुख सचेतकत नं उपस्थित जूगु खः ।
