मूलपानीइ गोली प्रहार

येँ (सन्ध्या टाइम्स)/येँ जिल्लाया जोरपाटी लिकसं च्वंगु मूलपानी गाविस भवन लागाय् थौं सुथय् अज्ञात मनूतय्सं गोलीं कयेकाः छम्हेसित घाःपाः याना बिउगु दु। लँय् सामान मीम्ह सुरेन्द्र साह कानुयात गोलीं कयेकाः हतियारधारीत ख्वपपाखे बिसिउँ वंगु खः। गोलीं कयाः घाःपाः जूम्हेसित अनया मेडिकल कलेज जोरपाटीइ वासः याकातःगु दु। बौद्ध लागां मोटरसाइकलय् वःपिं निम्ह अज्ञात मनूतय्सं 'मोबाइल बियादिसँ फोन यायेमाःगु दु' धासें कानुयात गोलीं कयेकूगु खँ प्रत्यक्षदर्शीतय्सं धाःगु दु। गोलीं कयेकाः बिसिउँ वंपिंत प्रहरीं मालाच्वंगु दु। लँय् सामान मिउ जुइम्ह मनूयात छाय् गोलीं कयेकल धइगु खँ धाःसा सीके मफुनि ।