मृत्युया छु ठेगान
येँ (सन्ध्या टाइम्स)/लँय् जा नःथाय् अबुपिंसं भचाभचा ड्रिंक्स याःगु खनाः अय्लाः नवल धासें प्यम्हं मस्त गाडी हिलाः मेगुली च्वंवंगु जुयाच्वन। आखिर वहे गाडी दुर्घटनाय् लानाः प्यम्हय् निम्ह सितसा मेपिं निम्ह गम्भीर अवस्थाय् लानाच्वंगु दु। म्हीग बहनी हेटौंडां वीरगंजपाखे वनाच्वंगु कार व ट्रक ठक्कर नयाः उगु दुर्घटना जूगु खः। उकी लानाः ड्रिंक्स मयासे गाडी चले याःम्ह मस्तय् अंकल दिनेश आचार्य व १७ दँ दुम्ह पलिस्था मानन्धर घटनास्थलय् हे सीगु खःसा १२ दँया उमंग गौतम थौं सुथय् वीरगंजय् मंत। गाडीइ मुक्कं न्याम्ह दुगु खः। ल्यं दुपिं निम्ह मध्ये पलिस्थाया केहेँ १२ दँया तिसा मानन्धरयात येँया न्युरो अस्पतालय् व १२ दँया सर्वेश आचार्ययात बी एण्ड बी अस्पतालय् वासः याकातःगु दु। छ्यनय् घाः जूम्ह तिसाया अवस्था अतिकं गम्भीर दुसा सर्वेशया तुतिया क्वँय् न्हय्कू टुक्रा जुयाच्वंगु दु। दुर्घटनाया इलय् मस्तय् मांअबुपिं च्वनावंगु कार धाःसा न्ह्यःने वनाच्वंगु खः। लँय् छप्वाः जक हेडलाइट च्याका वःगु ट्रकय् उमिगु कार न्याः वंगु खँ धाःगु दु ।
