भारतलिसेया स्वापुती गल्ती जूगु खः: अनन्त

येँ (सन्ध्या टाइम्स)/माओवादी नेता वर्षमान पुनं(अनन्तं) भारतलिसे स्वापू कायम यायेगु सवालय् माओवादीं गल्ती याःगु खँ स्वीकार यानादीगु दु। भारतया न्हूदिल्लीइ नकतिनि जूगु छगू सेमिनारय् ब्वति काः वंम्ह भाजु पुनं अनं पिहां वइगु अंग्रेजी न्हिपौ 'द टेलिग्राफ' लिसे यानादीगु खँल्हाबल्हाय् थ्व खँ धयादीगु धकाः उगु न्हिपतिं च्वःगु दु।
खँल्हाबल्हाया झ्वलय् भाजु पुनं धयादिल, 'भारतलिसे स्वापू कायम यायेगु झ्वलय् जिपिंपाखें कुटनीतिक गल्ती जूगु हे खः ।'

वय्कलं हानं धयादीगु दु, 'जिपिं मूलधारया राजनीतिइ न्हूपिं जुल। उकिं थःपिं सरकारय् दुगु इलय् जिपिंपाखें भारतलिसे स्वापू कायम यायेगु सवालय् उकथंया गल्ती जूवंगु खः ।'

उकिया नापं हे वय्कलं थ्व खँ नं तनादिल, 'तर भारतं नं जिपिंलिसे बांलाःगु स्वापू मतः। जिपिंप्रतिया वयागु नकारात्मक बिचाः महिउ। भारतं उकिया कारण नं मधाः। वास्तवय् आः विकास जूगु गतिरोधया मू कारण थ्व नं खः ।'

पत्रिकाय् धयातः कथं सत्ताय् च्वनाबलय् थःपिंसं यानागु थीथी गल्तीत मध्ये मेगु छगू गल्ती तत्कालिन प्रधानसेनापति रुक्मांगत कटवालयात चीकेत यानागु कुतः नं खः धकाः नं भाजु पुनं धयादीगु दु। कटवालयात चीकेगु वहे प्रकरणं यानाः माओवादीया तत्कालिन प्रधानमन्त्री पुष्पकमल दाहाल (प्रचण्डं) पदं राजीनामा बीमाःगु खः।
वय्कलं माओवादी लडाकुयात सेना समायोजन याये हे माःगु खँय् नं बः बियादीगु दु। नेपाली सेना अझ नं लोकतान्त्रीकरण मजूनि धासें वय्कलं यदि सेनायात लोकतान्त्रीकरण यायेगु खःसा माओवादी सेना व नेपाली सेना समायोजन यायेमाःगु बिचाः नं वय्कलं प्वंकादिल।
समाचारय् ४० दँ दुम्ह भाजु पुनयात थौंकन्हय् पार्टी व लडाकु दथुया ताँपु जुयाच्वंम्ह कार्यकर्ता धासें थौंकन्हय् सकस्यां ध्यान बियाः स्वयाच्वंम्ह अतिकं सम्भावना दुम्ह नेता खः धकाः नं धयातःगु दु ।