नीच्यागू दलया मुँज्या अनिश्चितकालया निंतिं स्थगित
संविधानया विवादित विषय क्वःछीत संवैधानिक समितियात सक्रिय यायेत दलत सहमत जूगु दु । दलतय्गु थ्व सहमतिलिसें संविधानसभाय् प्रतिनिधित्व याइगु नीच्यागू दलया मंकाः मुँज्या अनिश्चितकालया निंतिं स्थगित जूगु दु ।
सिंहदरवारय् थौं च्वंगु नीच्यागू दलया मुँज्यां वैधानिक संयन्त्र जूगुलिं संवैधानिक समितियात हे क्रियाशील दयेकेत उचित जुइगु निर्णय याःगु एकीकृत नेकपा माओवादीया न्वकु नारायणकाजी श्रेष्ठ 'प्रकाशं' जानकारी बियादिल ।
नियमावली संशोधनलिपा संविधानया विवादित विषयसं सहलह यायेत नियमितरुपं संवैधानिक समितिया मुँज्या च्वनीगु जानकारी वय्कलं बियादिल । थौंया मुँज्याय् व्यवस्थापकीय अंगया स्वरुप निर्धारणय् सहलह जूसां नं सहमति धाःसा जुइमफुत । दलतदथुइ ग्वःदँय् बालिग मताधिकार दइगु, केन्द्रय् गुलि सदन च्वनीगु, सदनया नां छु तयेगु लगायत विषयसं मतभेद दु ।
