लडाकूयात विशेष समिति मार्फत हयेगु ज्याझ्वः यायेगु भाला इनाकाल
एकीकृत नेकपा (माओवादी)या लडाकूतय्त विशेष समिति मातहत हयेगु औपचारिक समारोह यायेगु निंतिं सरकार व माओवादीं दथुइ भाला इनाकाःगु दु ।
सरकार व माओवादीयात ब्यूगु जिम्मा कथं ज्याझ्वः ग्वसाः ग्वयेगु भाला माओवादीयात ब्यूथु दु । अथेहे ज्याझ्वःया व्यवस्थापनया भाला धाःसा गृहमन्त्रालययात ब्यूगु दु ।
सिंहदरबारय् थौं च्वंगु सेना समायोजन विशेष समितिया बैठकं गृहमन्त्री भीम रावलया कजित्वय् स्वम्ह दुजः दुगु व्यवस्थापन समिति नीस्वनेगु निर्णय याःगु दु । समितिइ माओवादीया वर्षमान पुन 'अनन्त' व कांग्रेस नेता रामशरण महतपिं दुजः कथं च्वनादीगु खः ।
सरकार व माओवादी दथुइ चितवनया शक्तिखोरस्थित स्वंगूगु डिभिजन मुख्यालयसं वइगु शनिवाः विशेष समारोहया ग्वसाः ग्वयाः जनसेना विशेष समिति मातहत वःगु घोषणा यायेगु म्हिगः सहमति जूगु खः ।
अथेहे थ्वहे दथुइ शिविर लिसे लडाकूतय् अनुगमन यायेत खुम्ह दुजः दुगु संयन्त्र गठनप्रति मधेशवादी दलं च्यूताः प्वंकूगु दु । संयन्त्रय् थःपिनिगु नं प्रतिनिधित्व जुइमाःगु उमिगु माग दु । थ्व स्वयाः न्ह्यः अनमिनं कःघानाः वयाच्वंगु नेपाली सेना, जनमुक्ति सेना लिसे उमिगु ल्वाभःया रेखदेख व अनुगमन यायेगु भाला विशेष समितियात बिइत सरकार व माओवादी वंगु बुधवाः सहमत जूगु खः ।
