माओवादीया विवाद केन्द्रीय समितिइ, प्रशिक्षण ज्याझ्वः स्थगित
एकीकृत नेकपा (माओवादी) दुने खनेदुगु विवाद केन्द्रीय समितिया मुँज्यां क्वःछीगु जूगु दु । पार्टी दुनेया आन्तरिक विवाद मिले यायेत मंगलवाः च्वंगु स्थायी समितिया मुँज्यां बुधवाः पोलिट्व्युरो व बिहीवाः केन्द्रीय समितिया मुँज्या सःतेगु निर्णय याःगु खः । विवाद समाधान याये न्ह्यः सोमवाःनिसें न्ह्याःगु देय्व्यापी कार्यकर्ता प्रशिक्षण नं माओवादीं स्थगित याःगु दु ।
बुधवाः तमुवान राज्य समितिया पोखराय् व मगरात राज्य समितिया ७ गते दाङ्गय् क्वःछ्यूगु प्रशिक्षण ज्याझ्वः स्थगित याःगु खः ।
थःगु ब्यागलं मतयात नं प्रशिक्षण ज्याझ्वलय् न्ह्यःब्वये दयेमाःगु न्वकु डा. बाबुराम भट्टराईया अडान लिपा माओवादीइ न्हूगु विवाद न्ह्याःगु खः । सोमवाः नेवाः व ताम्सालिङ राज्यया जिल्लास्तरया कार्यकर्तातय्त ब्यूगु प्रशिक्षण ज्याझ्वः डा. भट्टराई लगायत वय्कःया समर्थकपिंसं बहिष्कार याःगु खः ।
छुं ई न्ह्यः च्वंगु माओवादी केन्द्रीय समितिया मुँज्यां डा. भट्टराई लगायतं प्रचण्डया प्रतिवेदनय् च्वःगु नोट अफ डिसेन्टयात आन्तरिक पत्रिकापाखें बहसय् हयेगु निर्णय याःगु खः ।
