ल्वाभः हयेगु सरकारया पलाःप्रति माओवादी आक्रामक
अनमिनया बहिर्गमनलिसे भारतपाखें घातक ल्वाभः हयेगु तयारी यानाच्वंगु नेपाल सरकारया पलाः विरुद्ध माओवादीं कुंख्युंगु दु ।
थौं च्वंगु स्थायी समिति मुँज्यां नेपाल सरकारं भारतपाखें घातक ल्वाभः दुतहयेत याःगु तयारीया विरोध याःगु दु । मुँज्या लिपा सञ्चारकःमिपिंलिसे खँल्हाबल्हा यानादिसें प्रवक्ता दीनानाथ शर्मां सरकारं शान्ति सम्झौता अःखः ज्या यायेत्यंगुलिं थुगु विषयलय् सरकारलिसे गम्भीर वार्ता यायेगु जानकारी बियादिल ।
माओवादीं कुंख्युंगुया बाबजुद नं सरकारं ल्वाभः हःसा शान्ति सम्झौता भंग जूगु तायेकीगु शर्मां धयादिल । ल्वाभः हयेत्यंगु सम्बन्धय् थौं हे माओवादीया नायः पुष्पकमल दाहाल 'प्रचण्डं' प्रधानमन्त्री माधव कुमार नेपालयात नापलानाः ध्यानाकर्षण यानादीगु खः । प्रचण्डं शान्ति सम्झौता त्वाःथलेगु कथं सरकारं ल्वाभः हयेत्यंगुलिं थ्व पलाः याकनं दिकेत ख्याच्वः ब्यूगु श्रोतं जानकारी ब्यूगु दु ।
