भारतीय विदेश छ्याञ्जे नेपालय्
भारतीय विदेश छ्याञ्जे निरुपमा राव स्वन्हु भ्रमणया नितिं थौं नेपाः थ्यंक झाःगु दु । वय्कः सुथसिया झिताः त्या इलय् येँय् थ्यंक झाःगु खः । नेपाः वयेवं हे वय्कलं न्हिनय् परराष्ट्र मन्त्रालयया छ्याञ्जे मदनकुमार भट्टराईयात व अनंलिपा राष्ट्रपति डा. रामवरण यादव, प्रधानमन्त्री माधबकुमार नेपाल व सभामुख सुवास नेम्वाङयात नापलायेगु ज्याझ्वः दु । रावं मू राजनीतिक दलया शीर्ष नेतातय्त धाःसा कन्हय् जक नापलानाःदीत्यंगु नेपाःस्थित भारतीय दूतावासया प्रवक्ता अपूर्वा श्रीवास्तवं जानकारी बियादिल ।
नापलायेगु झ्वलय् न्हापाया सम्झौता कार्यान्वयनय् जूगु प्रगतिबारे सहलह जुइगु परराष्ट्र मन्त्रालयं जानकारी ब्यूगु दु । संविधान निर्माण, शान्ति प्रक्रिया लिसे सरकार नीस्वनेगु ज्याय् लिबानाच्वंगु बारे भारतीय विदेश छ्याञ्जे रावं नेपालीपक्षलिसे सहलह याइगु भारतीय सञ्चार माध्यमतय्सं जानकारी ब्यूगु दु । अनमिनया बहिर्गमन लिपा हे जूगु रावया नेपाः भ्रमणयात अर्थपूर्णरुपं काःगु दु ।
