दमन सह याइमखु : डा. भट्टराई
पार्टी छधी यायेगु प्रतिबद्धता
एकीकृत नेकपा माओवादीया न्वकु डा. बाबुराम भट्टराईं पार्टीया आन्तरिक जनवाददथुइ दमन जूगुलिं प्रशिक्षण ज्याझ्वः बहिस्कार यानागु धयादीगु दु । पार्टीयात छधी यानाः यंकेगु वय्कलं प्रतिबद्धता नं प्वंकादीगु दु । पार्टीया मुखपत्र जनादेश वाःपौलय् थौं पिहांवःगु खँल्हाबल्हाय् न्वकु डा. भट्टराईं पार्टी विधान व केन्द्रीय समितिया लिपांगु निर्णयसं ब्यागलं मतयात क्वय्तक्क प्रवाहित यायेगु स्पष्ट न्ह्यःथनातःसां नं अथे मयाःगुलिं प्रशिक्षण बहिस्कार यानाःगु धयादीगु खः ।
'जिमिगु पार्टी विधान व केन्द्रीय समितिया निर्णयया उल्लंघन, अन्तरिम जनवाद सम्बन्धी सर्बहारा मूल्यमान्यताया नं तप्यंक उल्लंघन व आन्तरिक जनवाददथुइ दमन जूगुलिं उकिया विरोधकथं जिं प्रशिक्षण बहिस्कार यानाःगु खः,' खँल्हाबल्हाय् न्ह्यथनातःगु दु । वय्कलं पार्टी नेतृत्व तहपाखें हे पार्टी विधान व निर्णय उल्लंघन याःगुलिं उकिया विरोध यायेगु थःगु कर्तब्य जूगु धयादीगु खः । 'पार्टी नेतृत्व तहपाखें हे विधान व निर्णय उल्लंघन यात, उकिया विरोध यायेगु जिमिगु कर्तब्य खः, व पूवंकाःगु खः,' खँल्हाबल्हाय् डा. भट्टराईं धयादीगु दु, 'तर पार्टीयात छधी यायेगु खँय् जिपिं प्रतिबद्ध दु । थुकियात सुनां नं ब्यागलं हिसाबं अर्थ थुइके मते ।'
दमन कदापि सह मयायेगु धयादिसें डा. भट्टराईं थःगु निर्णयं पार्टीया छु नं गतिविधि व मेमेगु पार्टीलिसेया स्वापूयात लिच्वः मलाकेगु दाबी नापं यानादीगु दु ।
