माओवादीपाखें जनविद्रोहया प्रशिक्षण
येँ (सन्ध्या टाइम्स)/एकीकृत माओवादीं थनिंनिसें देय्न्यंकंया कार्यकर्तायात शान्ति, संविधान व जनविद्रोहया तयारीया प्रशिक्षणया अभियान न्ह्याकूगु दु ।
थौं येँय् नेवाः राज्य व ताम्सालिङ राज्यया जिल्ला स्तरीय न्याद्वःम्ह कार्यकर्तायात प्रशिक्षण बियाच्वंगु दु। निगू राज्य समिति अन्तर्गतया थीथी विभागीय राज्य समितिया दुजःत नापं सल्लाहकारत नं दुथ्याइ धकाः धाःगु दु ।
येँया भृकुटी मण्डप लागाय् थ्व प्रशिक्षण बियाच्वंगु खः। माओवादीया अध्यक्ष प्रचण्ड, वरिष्ठ उपाध्यक्षपिं मोहन बैद्य किरण व डा. बाबुराम भट्टराई नापं महासचिव रामबहादुर थापा बादलं थ्व प्रशिक्षण बीगु ज्याझ्वः तयातःगु खः। शान्ति व संविधानया नितिं अधिकतम कुतः यायेगु अले उकी पंगः थन धाःसा शान्तिपूर्ण जनविद्रोह यायेगु रणनीति कथंया प्रशिक्षण बीगु ज्या याइ धकाः माओवादीया छम्ह नेतां धयादीगु दु ।
पार्टीया अध्यक्ष प्रचण्डं तयार यानादीगु न्हूगु कार्यदिशानापंया प्रतिवेदनय् उपाध्यक्ष डा. बाबुराम भट्टराईपाखें न्ह्यब्वःगु फरक मतयात नं प्रशिक्षणय् कार्यकर्तातय्थाय् यंकी धकाः माओवादीया नेतां धयादीगु दु ।
