स्वनिगलय् च्यागू भूमिगत सशस्त्र पुचः सक्रिय
येँ (सन्ध्या टाइम्स)/थीथी कथंया राजनीतिक नापं मेमेगु कथंया माग यानाः भूमिगत कथं हे हिंसात्मक गतिविधि याना वयाच्वंगु १०७ गू भूमिगत सशस्त्र पुचःत मध्ये स्वनिगलय् जक हे च्यागू पुचः सक्रिय जुयाच्वंगु दु ।
प्रहरी प्रधान ज्याकूपाखें सार्वजनिक याःगु विवरणय् स्वनिगलय् थौंकन्हय् क्रियाशिल जुयाच्वंगु अज्वःगु कथंया च्यागू भूमिगत सशस्त्र पुचःया आधार क्षेत्र धइगु तराई जूसां इमिसं स्वनिगलय् हे केन्द्रित यानाः हिंसात्मक गतिविधि याना वयाच्वंगु खँ न्ह्यथंगु दु।२०६६ मंसीर महिनांनिसें २०६७ मंसीर महिना तकया गतिविधियात आधार दयेकाः प्रहरी प्रधान ज्याकूपाखें तयार याःगु विवरणय् स्वनिगलय् अखिल तराई मुक्ति मोर्चा (गोइत पुचः), ज्वाला पुचः व प्रताप पुचःपाखें वम विष्फोट यायेगु व ख्याच्वः बिइगु यानाच्वंगु खँ न्ह्यथंगु दु ।
उगु हे कथं भूमिगत कथं आपराधिक गतिविधि यायेगुली नेपाल डिफेन्स आर्मी, तराई कोब्रा, राष्ट्रिय आर्मी नेपाल, नागराज पुचः, इन्टरनेशलन टाइगर्स सक्रिय जुयाच्वंगु दु। उगु हे पुचःतपाखें स्वनिगलय् बम मुइकेगु नापं आपराधिक घटनात यानाच्वंगु खः। अथे सशस्त्र पुचःत स्वनिगःया स्वंगू जिल्ला येँ, यल व ख्वप मध्ये नं येँय् अप्वः सक्रिय जुयाच्वंगु दुसा निगू जिल्लाय् छुं छुं घटना यायेगु यानाच्वंगु दु ।
स्वनिगलय् चीधंगु जक घटना याये फत धाःसां उकिं तःधंगु लिच्वः लाइगु जुयाः हे अथे सशस्त्र पुचःत येँय् सक्रिय जुया वयाच्वंगु खः। इमिसं ख्याच्वः बिया चन्दा कायेगु नं यानाच्वंगु अले चन्दा काये धुंकाः हाकनं तराईलय् हे बिसिउ वनेगु नं यानाच्वंगु दु ।
