सहमतिया सरकार दयेकेत माओवादी पहल
येँ (सन्ध्या टाइम्स)/राष्ट्रपतिं आह्वान याःकथं सहमतिया प्रधानमन्त्री ल्ययेगु लागिं आः हानं माओवादीं हे पहल शुरु याःगु दु। माओवादीं यदि बहुमतया सरकार दयेकेगु जुल धाःसा एमाले अध्यक्ष झलनाथ खनालयात समर्थन यायेगु धकाः खँ पित हयाच्वंसां सहमतिया सरकार गठन यायेगु सवालय् धाःसा थःपिंसं तुं पहल यायेगु धाःगुलिं एमालें उकियात धाःसा समर्थन याइगु सम्भावना म्हो जक दुगु खँ धाःगु दु। सूत्रं बिउगु जानकारी कथं एमालें आः तक नं झलनाथ खनालयात प्रधानमन्त्रीया उम्मेदवार दयेकेगु धकाः निर्णय मयाःनिगु कारणं यानाः माओवादीं नं खनालयात समर्थन यायेगु खँ प्रस्ट जुइक धाःगु मदुनि। आः सहमतिया सरकार गठन यायेगु लागिं एमालेपाखें गज्याःगु पहल म्हिती धइगु खँ धाःसा आः तक खुले मयाःनि। कांग्रेस दुने धाःसा रामचन्दर पौडेलं पहल याये मफुगुलिं आः शेरबहादुर देउवायात अवसर बीमाः धइगु खँ पिहां वःगु दु ।
