लडाकूतय्त विशेष समिति मार्फत हयेगु तिथि कन्हय् क्वःछीगु
सरकार व माओवादी दथुइ जूगु सहमति कथं माओवादी लडाकुतय्त विशेष समितिया मातहतय् हयेत याइगु औपचारिक ज्याझ्वःया तिथि कन्हय् क्वःछीगु जूगु दु ।
प्रधानमन्त्री माधवकुमार नेपाल व माओवादी नायः पुष्पकमल दाहाल 'प्रचण्ड' दथुइ थौं सिंहदरवारय् जूगु सहलहस मंगलवाः थप सहलह यानाः तिथि क्वःछीगु सहमति जूगु प्रचण्डं जानकारी बियादिल । थुगु विषयसं सहमति जुइधुंकूगुलिं प्राविधिक तयारी यानाः गुकथं यायेगु धइगु विषय ल्यं दनीगु वय्कलं जानकारी वय्कलं बियादिल ।
थ्व स्वयाः न्ह्यः वंगु शुक्रवाः जूगु सहमतिकथं छवाःदुने विशेष ज्याझ्वः यानाः लडाकुयात विशेष सहमतिइ हयेगु क्वःछ्यूगु खः । अथेहे यानाः थौंया मुँज्याय् माओवादीं वंगु शुक्रवाः जूगु स्वंगू बुँदे सहमतिया गलत व्याख्या मयायेत प्रधानमन्त्रीयात ख्याच्वः ब्यूगु दु । प्रचण्डं थुकथं अपव्याख्या याःसा शान्ति प्रक्रियाय् ज्यामछिनीगु ख्याच्वः नापं ब्यूगु खः ।
