बाबुरामपाखें प्रशिक्षण बहिष्कार
थनिंनिसें सुरू जूगु एकीकृत नेकपा (माओवादी)या कार्यकर्ता प्रशिक्षणया ज्याझ्वः पार्टीया न्वकु डा. बाबुराम भट्टराईं बहिष्कार याःगु दु ।
न्वकु भट्टराईं थःगु ब्यागलं मतयात नं प्रशिक्षणय् तयेदयेमाःगु माग यासें थौंया ज्याझ्वलय् ब्वति कयामदीगु खः । प्रशिक्षण न्ह्याये न्ह्यः भृकुटीमण्डपस्थित कर्मचारी संगठनया ज्याकुथिइ च्वंगु माओवादी पदाधिकारी मुँज्याय् डा. भट्टराईं केन्द्रीय समिति मुँज्यापाखें पारित नायः पुष्पकमल दाहाल 'प्रचण्ड'या दस्तावेजय् थःम्हं तयाःगु ब्यागलं मतबारे नं कार्यकर्तातय्त जानकारी बीमाःगु माग यानादीगु खः ।
तर केन्द्रीय समिति मुँज्यां ब्यागलं बिचाःयात पार्टीया आन्तरिक प्रकाशन 'बिचारधारा' नांया पत्रिकापाखें बहस न्ह्याकेगु निर्णय याःगु मेमेपिं नेतातय्सं न्ह्यथनेवं डा. भट्टराईं मुँज्यापाखें हे पिहांवंगु खः । प्रशिक्षण ज्याझ्वलय् न्वकु भट्टराईया कलाः लिसे माओवादी पोलिटव्युरो दुजः हिसिला यमिं मञ्चय् वनाः ब्यागलं मत नं तयेदयेमाःगु न्ह्यःथनादीगु खः ।
अनंलिपा नायः प्रचण्डं केन्द्रीय समितिपाखें छगू मतं पारित पार्टीया कार्ययोजना बारे जक कार्यकर्तायात प्रशिक्षण बिइमाःगु व ब्यागलं बिचाःयात बहस यानाः वनेगु केन्द्रीय समितिया निर्णयबारे थप स्पष्ट यानादीगु खः । वय्कलं पार्टीया मुँज्या च्वनाः थुगु समस्याया समाधान याइगु जानकारी बियादीगु खः ।
