अनमिन लिहांवनेवं भारतं नेपाःयात घातक ल्वाभः
राष्ट्रसंघीय नियोग अनमिनया बहिर्गमनलिसें भारतं नेपाःयात घातक ल्वाभः उपलब्ध यायेगु तयारी याःगु दु । लोकतन्त्रया रक्षा व नियमित तालिमया निंतिं धासें भारतं नेपाली सेनाया नितिं घातक ल्वाभः उपलब्ध यायेत्यंगु खः । वंगु ला नेपालं याःगु औपचारिक इनाप कथं भारतं अत्यावश्यक ल्वाभः व बन्दोबस्तया ज्वलं उपलब्ध यायेत्यंगु भारतीय पत्रिका इण्डियन एक्सप्रेसं जानकारी ब्यूगु दु ।
थ्व स्वयाः न्ह्यः भारतं उपलब्ध याकूगु बख्तरबन्द गाडी, गोली गठ्ठा व पुलांगु ईन्सास राइफलया पलेसा व स्वयाः आधुनिक ल्वाभः व बन्दोबस्तया ज्वलं नेपाःयात उपलब्ध यायेत्यंगु पत्रिकाया थौंया ल्याखय् न्ह्यथनातःगु खः ।
भारतीय स्थल सेनाध्यक्ष विजयकुमार सिंहं वंगु ला याःगु नेपाः भ्रमणया झ्वलय् सरकारं अवरुद्ध सैन्य ग्वाहालि सुचारु यायेत माग याःगु खः । थ्व स्वयाः न्ह्यः भारतं नेपाली सेनाया नियमित तालिम व अभ्यासया निंतिं उपलव्ध यानाः वयाच्वंगु सैन्य ग्वाहालि तत्कालीन शाही शासनलिपा दीगु खः ।
