सभामुखयात नेवाःतय् लुमन्ति पौ
नेवाःतय्सं न्हूगु संविधानय् नेवाःय् अधिकार सुनिश्चित यायेमाःगु माग यासें थौं सभामुख सुभाषचन्द्र नेम्वाङयात लुमन्ति पौ लःल्हाःगु दु ।
सिंहदरवार स्थित सभामुखया ज्याकूथी वनाः नेवाः स्वायत्त राज्य मंकाः संघर्ष समितिया छगू प्रतिनिधिमण्डलं झिगू बुँदे लुमन्ति पौ सभामुखयात लःल्हाःगु खः । समितिं न्हूगु संविधानय् संघीयता, लोकतान्त्रिक गणतन्त्र व धर्मनिरपेक्ष संस्थागत यायेत माग याःगु दु । अथेहे स्वायत्तता, स्वशासन, आत्मनिर्णय व अग्राधिकारनापया नेवाः स्वायत्त राज्य सुनिश्चि यायेत राज्यया ध्यानाकार्षण याकूगु दु ।
संघर्ष समितिया नायः सानुराजा शाक्यं लःल्हानादीगु लुमन्ति पौलय् प्रस्तावित नेवाः राज्यया सिमांकन क्षेत्रफल चिधंगु, नेवाः स्वायत्त राज्य दुनेया फुक्कं प्राकृतिक श्रोतय् नेवाःतय् अग्राधिकार सुनिश्चित यायेमाःगु, बहुभाषिक देय् अनुकुल केन्द्रय् छगू स्वयां अप्वः भाय्यात आधिकारिक भाय्या कथं नालेमाःगु लगायत बुदाँत दुथ्याकातःगु दु ।
अथेहे समितिं छुं नं बहानाय् 'संक्षिप्त संविधान' जारी याःसा उगु संविधानयात नेवाःतय्सं मान्यता मबीगु ख्याच्वः तं ब्यूगु दु ।
लुमन्ति पौ लःलहाना कयादिसें सभामुख नेम्वाङं थुगु लुमन्ति पौपाखें संविधान निर्माणय् ग्वाहालि याइगु व मागया सम्बन्धय् थःम्ह संविधानसभा व सम्बन्धित समितिया ध्यानाकर्षण याकीगु प्रतिबद्धता प्वंकादिल ।
