थौं झिंस्वक्वःगु भुखाय् दिवस
थौं माघ २ अर्थात राष्ट्रिय भुखाय् सुरक्षा दिवस । भुखाय्या जोखिम म्हो यायेत जनचेतना ब्वलंकेगु ताः तयाः थीथी ज्याझ्वः यानाः थौं थुगु दिवस हंगु दु ।
नेपालय् विक्रम संवत् १९९० माघ २ गते वंगु तःभुखाचं सीपिंत लुमंकाः २०५४ सालं निसें प्रत्येक दँया माघ २ गते राष्ट्रिय भुखाय् सुरक्षा दिवस हनावयाच्वंगु दु । भुखाय् दैवीक प्रकोप जूगुलिं थुकीया नियन्त्रण असम्भव जूसां क्षति व जोखिम म्हो यायेफइ धइगु सन्देश नापं थौं सुथय् येँय् प्रभातफेरी ज्याझ्वः जुल ।
प्रभातफेरी लिपा तत्कालीन प्रधानमन्त्री जुद्भ शम्सेरं १९९० सालय् वंगु तःभुखाचय् लानाः सीपिनि लुमन्तिइ दयेकूगु शिलालेख सहितया भुखाय् स्तम्भय् वनाः गृहमन्त्री भीम रावल, येँ महानगरपालिकाया कार्यकारी प्रमुख आनन्दराज पोखरेल लगायतं स्वाँ देछाःगु खः ।
१९९० सालय् वंगु तःभुखाय् लिपा नेपालय् तःधंगु भुखाय् मवंगुलिं भुखाय्या जोखिमया हिसावं नेपाः तसकं खतराय् दुगुलिं विज्ञतय्सं सचेत जुइत इनाप यानावयाच्वंगु दु ।
आः तःभुखाय् वंसा स्वनिलय् म्होतिं पीद्वः मनूत सीगु थीथी अध्ययनं क्यंगु दु । अथेहे छगू लख स्वयां अप्व: मनूत घाःपाः जुइगु, न्हय्गू लख छेँविहीन जुइगु व खुइगू प्रतिशत छेँ नष्ट जुइगु अध्ययनं क्यंगु दु ।
