'अन्तर्राष्ट्रिय महासन्धिया भावना दुमत्थ्याकूसाः संविधान अमान्य'
आदिवासी जनजाति बृहत्त मोर्चां न्हूगु संविधानय् अन्तर्राष्ट्रिय महासन्धिया भावना कथं जनजातिया अधिकार सुनिश्चित यायेत माग याःगु दु । इमिसं संविधानसभाया थीथी विषयगत समितिं तयार याःगु अवधारणापौ व उच्चस्तरीय कार्यदलया सहमतिलय् थीथी अन्तर्राष्ट्रिय महासन्धिया भावना दुमत्थ्याकूगु धासें अज्याःगु भावनायात दुमथ्याकूसाः आदिवासी जनजातितय्त न्हूगु संविधान मान्य मजुइगु ख्याच्वः ब्यूगु दु ।
सभामुख सुभाषचन्द्र नेम्वाङयात थौं ज्ञापनपौ लःल्हासें मोर्चां राज्यं जनजातिया अधिकार बहालीया मागयात बेवास्ता याःसा कडा आन्दोलन यायेगु ख्याच्वः ब्यूगु दु । मोर्चां संविधान निर्माणय् आदिवासी जनजातियात प्रभाव लाकीगु प्रावधान तयेगु व मतेगु बारे सम्बन्धी पक्ष नाप पूर्वपरामर्श कायेत नं सभामुखया ध्यानाकर्षण याकूगु दु ।
अथेहे आदिवासी जनजातिया स्वतन्त्र व पूर्व जानकारी सहितया मञ्जुरी संयन्त्र तत्काल निर्माण यायेमाःगु माग नं मोर्चां याःगु दु । नापं इमिसं आदिवासी जनजातिया मानवअधिकारया सम्बन्धय् नेपाः सरकारं थीथी विश्व मञ्चय् छ्वःगु प्रतिवेदन बारे नं सभामुखया ध्यानाकर्षण याकूगु खः ।
उगु इलय् सभामुख नेम्वाङं सरकारं छ्वःगु पौ व प्रतिवेदनया बारे थःयात पूर्ण जानकारी मदुसां न्हूगु निर्माण जुइगु संविधानय् आदिवासी जनजातितय् अधिवकार सुनिश्चित जुइगु विश्वास प्वंकादिल ।
