सेनाय् नं नेवाःयात हे कोर्ट मार्शल !
येँ (सन्ध्या टाइम्स)/सेनाया मनू जुयाः नं राजनीतिक पार्टीया नेतात नापलाः जुल धकाः नेपाली सेना दुने छम्ह नेवाः अधिकृतयात कोर्ट मार्शलया तयारी जूगु खँ सीदुगु दु।
नेपाली सेनाया इन्जिनीयरिंग फाँटय् ज्या याइम्ह सहायक सेनानी किरण वज्राचार्ययात सेनां कोर्ट मार्शलया तयारी याःगु खः। थुकी वय्कः नापं वय्कः मातहत ज्या याइपिं मेपिं छपुचः सैनिक कर्मचारीयात नं कोर्ट मार्शल जुइगु खँ सूत्रं धाःगु दु। थ्वहे प्रकरणय् किरण श्रेष्ठ नांया छम्ह सैनिक कर्मचारीयात विभागं मेथाय् सरुवा नं याना छ्वयेधुंकूगु दु ।
सहायक सेनानी किरण वज्राचार्य लगायतया पुचःयात रक्षा मन्त्री विद्या भण्डारीयात नापलाः वंगु धइगु द्वपं लानाच्वंगु खँ सीदुगु दु। तर उमिसं रक्षा मन्त्रीयात नापलाः वंगु खः वा मखु धइगु खँ पुष्टि धाःसा जुइ फुगु मदुनि। थ्व पुचःयात रक्षा मन्त्रीयाथाय् वनाः विभागया प्रमुख नरेश बस्नेतया म्याद थपे याये मते धकाः लबिङ्ग याः वंगु द्वपं लानाच्वंगु दु। यदि बस्नेतया म्याद थपे मजुल धाःसा वय्कःया थासय् प्रमुख जुया वइम्ह किरण वज्राचार्य खः ।
उकिं वज्राचार्यं थः प्रमुख जुइत रक्षा मन्त्रीयाथाय् तक लबिङ्ग याः वन धकाः वय्कः विरुद्ध कोर्ट मार्शलया तयारी याःगु खँ सूत्रं धाःगु दु। वज्राचार्यं धाःसा थः गनं नं लबिङ्ग याः मवनागु व थः विरुद्ध सुनां उजुरी हे तःगु मदुसां अथें हे न्यनाखँया भरय् कोर्ट मार्शल यायेत्यंगु थः पासापिंत कनाच्वंगु खँ धाःगु दु। थ्व पुचःयात रक्षा मन्त्री नापलाः वंगु द्वपं बिउसां स्वय्म रक्षा मन्त्रीं धाःसा थःत सुं सैनिक अधिकारीं नापलाः वल धकाः जानकारी बियामदीगु खँ नं सीदुगु दु ।
मेखे नेपाल वायुसेवा निगमय् सुगतरत्न कंसाकार लिपा आः सेनाय् किरण वज्राचार्ययात कारवाही याये त्यंगुलिं थ्व गनं जातिगत रुपं हे पूर्वाग्रह तयाः ज्या यानाच्वंगु मखुला धकाः नेवाः ख्यलं आशंका यानाहःगु दु ।
