साय्मि व प्रधानयात धुस्वां सिरपाः
गंकी धुस्वां-बसुन्धरा प्रतिष्ठानया ग्वसालय् गंकी धुस्वां बसुन्धरा सिरपाः वरिष्ठ उपन्यासकार मथुरा सायमियात व धुस्वां साय्मि सिर्जना सिरपाः वरिष्ठ गायक प्रेमध्वज प्रधानयात लःल्हात। म्हिगः होटल शंकरय् छगू ज्याझ्वःया दथुइ एनेकपा (माओवादी)या अध्यक्ष पुष्पकमल दाहाल 'प्रचण्डं' उगु सिरपाः लः ल्हानादीगु खः ।
सिरपाः लःल्हानादिसें अध्यक्ष प्रचण्डं धुस्वां साय्मियात थःपिंसं न्हापांखुसी नापलानाबलय् हे वय्कलं थःपिंत छगू गहन छाप तयादीगु खँ लुमंकादिल। वय्कलं शान्ति प्रक्रियाया सवालय् म्हीग थीथी दल व थःपिंलिसे जूगु सहमति छगू 'आइस ब्रेक' खःसां पूरा बरफ हे नाया वंगु धाःसा मदुनि धयादिल। वय्कलं थःगु नेतृत्वय् नीस्वंगु उच्चस्तरीय कार्यदलं संविधानया मछिंगु बुँदात समाधान याना वनेगु ज्याय् योगदान हे याःगु खः धासें उकथं हे संविधान दयेका वन धाःसा झीसं संविधान निर्माण याये फइ धइगु विश्वास नं प्वंकादिल ।
सिरपा त्याकादीम्ह उपन्यासकार मथुरा साय्मिं थःत प्रेमबहादुर कसाः व धुस्वां साय्मिं बाखं व उपन्यास च्वयेत प्रेरणा बियादीगु खः धासें थौं बांमलाना वनाच्वंगु भाषाया स्थिति थकायेत नेवाःतय्सं नेवाः स्वायत्त राज्यया माग यानाच्वंगु दु, उकिया लागिं प्रचण्डं नेतृत्व यानादी माल धकाः इनाप यानादिल ।
गंकी धुस्वां-बसुन्धरा सिरपाः खस नेपाली लगायत देय्या थीथी भासं उपन्यास च्वइपिं साहित्यकारपिंत बीगु सिरपाः खःसा धुस्वां साय्मि सिर्जना सिरपाः देय्या कला, संगीत आदि ख्यलय् योगदान याना वःपिं सर्जकपिंत बीगु सिरपाः खः। निगुलिं सिरपाः नीद्वः तकाया खः ।
प्रतिष्ठानया नायः डा. अरुण सायमिया सामयिक च्वसु मुना "दरवार-हत्याकाण्डदेखि जनविद्रोह सम्म" व नेपालभाषा उपन्यास 'हाकुताँ' या निगूगु संस्करण नं मूपाहां प्रचण्डं विमोचन यानादीगु खः ।
डा. अरुण साय्मिया सभापतित्वय् न्ह्याःगु उगु ज्याझ्वलय् प्रतिष्ठानया दुजः लिसें कलाकार हरिप्रसाद वैद्य व नाटककार हरिहर शर्मापिंसं नं नुगःखँ प्वंकादीगु खः। प्रतिष्ठानं पुरस्कृति उपन्यासकार साय्मिया न्हूगु उपन्यास व गायक प्रेमध्वजया एल्बम पिकायेगु नं बचं बिउगु खः ।
