गनथाय् द्वंकल राष्ट्रपति भाजुं
राष्ट्रपति डा। रामवरण यादवं म्हीग बहनी बर्खास्त प्रधानसेनापति रुक्मांगद कटवालयात तप्यंक पौ च्वयाः छि सेनापति पदय् कायम हे दनि धकाः बहाली याना बीवं नेपाःया राजनीतिक अन्यौलताय् मेगु मोड हया बिउगु दु । म्हीग तक प्रधानसेनापतियात चीके जिउ लाकि मजिउ धकाः केन्द्रित जुयाच्वंगु राष्ट्रिय बहस म्हिगःनिसें राष्ट्रपितं प्रधानसेनापतियात अज्याःगु पौ च्वये जिउगु खः लाकि मखु धइगु न्हूगु बहसय् प्रवेश जूगु दु ।
प्रधानमन्त्रीं याना हःगु सिफा-रिसयात निरंकुश धाःिपं जुजुतय्सं नं स्वीकार याः । न्हापा गिरिजाप्रसाद कोइराला मनमोहन अधिकारी आदि- पिनि पालय् नं संसद भंगया सिफारिस जूगु खः । जुजुं उगु सिफारिसयात स्वीकार यानाः संसद भंग याना बिल । गिरिजाप्रसादं संसद भंग याःबलय् ला वय्कःया थःगु हे पार्टीया ३६ म्ह सांसदतय्सं संसद भंग यायेगु पाय्छि मखु धकाः जुजुयात जानकारी बिउगु खः । तर नं जुजुं निर्वाचित प्रधानमन्त्रीं याःगु सिफारिस कार्यान्वयन यायेत थः बाध्य खः धासें संसद भंग याना छ्वत । तर राष्ट्रपति डा। रामवरणं ला जुजुं याःगु ति तक नं यानामदिल ।
प्रधानमन्त्रीं याःगु ज्याय् वय्कःयात शंका दुगु खःसा थ्व पाय्छि खः लाकि मखु धकाः मुद्दायात अदालत छ्वया बी माःगु खः । छक्वः जुजु वीरेन्द्रं नं थःथाय् वःगु संसद भंगया छगू सिफारिस बारे राय कायेत सर्वोच्चय् छ्वःगु खः । प्रमं याःगु ज्या संविधानतः पाय्छि खः लाकि मखु धायेगु अधिकार ला सर्वोच्चयाके जक दु ।
संविधानय् यानातःगु व्यवस्था कथं राष्ट्रपितं छुं नं खँय् सहलह यायेगु प्रधान-मन्त्रीलिसे जक खः । सुं नं सभासदं राष्ट्रपतियात छुं धाये दु धकाः गनं उल्लेख मदु । राष्ट्रपतिलिसे डिल याइम्ह प्रधान-मन्त्री छम्ह हे जक खः । तर १८ दलं राष्ट्रपतियात इनाप यायेसातकि राष्ट्रपितं तप्यंक हे कटवालयात पौ च्वयेबल् सर-यात तप्यंक हे बाइपास याःगु ठहर जुइ ।
