अनमिनयात जा नकाः बिदाइ
येँ (सन्ध्या टाइम्स)/एकीकृत माओवादीं थौं सुथय् राष्ट्रसंघीय मिसन अनमिनया प्रतिनिधितय्त जा नकाः बिदाइ यात ।
सरकारं छुं औपचारिक ज्याझ्वः मयासे हे अनमिनयात विदाइ याये धुंकूगु दुसा माओवादीं थौं अनमिन न्यूयोर्कय् लिहां वने न्ह्यः जा नकाः बिदाइ याःगु खः। यलया छगू होटलय् याःगु उगु विदाइ ज्याझ्वलय् माओवादी अध्यक्ष प्रचण्ड नापं मेमेपिं नेतात व अनमिनपाखें राष्ट्रसंघीय विशेष प्रतिनिधि स्यामुअल ताम्राट, अनमिन प्रमुख करिन ल्यानग्रेन नापं मेमेपिं नं दुथ्याःगु खः। उगु ज्याझ्वलय् अनमिन प्रमुख ल्यानग्रेनं दलतय्सं शान्ति प्रक्रियाय् थःपिनि प्रतिबद्धता पूरा यायेमाः धकाः बः बियादिसें दलतय्गु न्ह्यःने जनताया चाहाना पूरा यायेगु तःधंगु हाथ्या वयाच्वंगु दु धकाः नं धयादीगु खः ।
