कागतिगांया प्रचार याःपिं पत्रकारतय्त हना
येँ (सन्ध्या टाइम्स)/ओखरपौवा गाविसया कागतिगामय् स्थानीय श्री महाँलक्ष्मी जनजागृति युवा क्लबया झिक्वःगु दँमुँज्याया लसताय् जूगु छगू ज्याझ्वलय् कागतिगांया विकासय् भूमिका म्हितूपिं थीथी संचारकर्मीयात हनेगु ज्या जुल। क्लबया अध्यक्ष सुर्यमान बलामीया सभापतित्वय् जूगु उगु ज्याझ्वलय् गाविसया कार्यबाहक अध्यक्ष व सचिव किरणमणि श्रेष्ठ मूपाहां कथं झाःगु खः ।
ज्याझ्वलय् न्ववासें 'ग्रामिण सन्देश'या सम्पादक समिर बलामीं पत्रकारतय्सं थुगु लागाय् विद्यमान बालविवाह बारे समाचार प्रकाशन यानाः उकियात निर्मूल यायेगु ज्याय् तःधंगु योगदान बिउगु खँ कनादिल। वय्कलं बलामी धइगु नेवाः दुनेया जाति मखुसें थःगु हे म्हसीका दुगु बिस्कं जाति खः धकाः नं कनादिल। वय्कलं थःगु गांया विकासया निंतिं निसलं मल्याक सतक नाटक निर्देशन यानाः बलामी भाषा, म्हसीका आदि बारे छगू सफू, डकुमेन्ट्री वा संकिपा हे निर्माण यायेगु प्रतिबद्धता नं प्वंकादिल ।
मूपाहां किरणमणि श्रेष्ठ संस्थां जिम्मेवारीपूर्वक थःगु ज्या पूवंकाच्वंगु खँ कँसें अझ नं ल्यं दनिगु सामाजिक विकृति व समस्या याकनं न्हंकेफयेमा धकाः भिंतुना देछानादिल।
ज्याझ्वलय् चलचित्र कला कार संघया उपाध्यक्ष व वरिष्ठ कलाकार मोहन निरौला, कान्तिपुर न्हिपौया देवेन्द्र अर्याल, ग्रामिण सन्देशया संपादक लिसें नयाँ पत्रिकाया संवाददाता समिर बलामी, गोरखापत्रया हरिशरण बलामी, त्रिशुली प्रवाहया विष्णु तारुके, राष्ट्रिय बलामी समाज नेपाल-२०६७ या अध्यक्ष मोहन बहादुर बलामी, छाँयाकार सानुकाजी थापा, गायक रामकृष्ण श्रेष्ठ, स्थानीय पत्रकार राजु लामा, गायक सन्तराम बलामि 'भावुक' नापं न्हय्म्ह पत्रकार व स्व्म्ह कलाकारयात हनेगु ज्या जूगु दु ।
गा.वि.स.या पूर्व अध्यक्ष जित बहादुर बलामी आदिया सहभागिया दुगु खः। उगु हे ज्याझ्वःया दथुइ स्थानीय विद्यालय श्री महाँकाल प्रा.वि. व भवानी मा.वि. या विद्यार्थीतय्त सिरपाः लःल्हायेगु लिसें प्रवेशिका परीक्षा २०६५/६६ स पास जूपिं विद्यार्थीतय्त दसिपौ लःल्हायेगु ज्या नं जूगु खः ।
