अनमिनपाखें स्वंगू बुँदे सहमति प्रति लसता प्वंकल
नेपाः स्थित राष्ट्रसंघीय राजनीतिक मिसन अनमिनं सरकार व एनेकपा (माओवादी) दथुइ शुक्रवाः जूगु सहमति प्रति लसता प्वंकूगु दु ।
अनमिनया लिप्पांगु न्हि शनिवाः अनमिन प्रमुख करिन ल्यानग्रेनं छगू विज्ञप्ति पिथना अनमिन लिहांवनेधुंकाः ल्वाभः व सेना अनुगमनयात निरन्तरता बीगु बारे सरकार व माओवादी दथुइ जूगु सहमति शान्ति प्रकृयाया आस्थायात सुदृढ यायेत तसकं महत्वपूर्ण जूगु धासें निगूलिं पक्षयात भिंतुना बियादीगु दु ।
वय्कलं थुगु सहमतियात निरन्तरता ब्यूसें निगूलिं पक्षं ताः ई निसें याये ल्यं दनीगु माओवादी सेनाया दुजःतय् समायोजन व पुनःस्थापनाया ज्यायात याकनं कार्यान्वयन याइगु विश्वास प्वंकादीगु दु ।
ल्वाभः व सेना अनुगमन संयन्त्रयात राष्ट्रसंघया निरन्तर ग्वाहाली दइगु नं अनमिनं विज्ञप्ति न्ह्यथनातःगु दु । ल्वाभः व सेना अनुगमन यायेत अनमिनं छ्यलाच्वंगु सामानत आःयात राष्ट्रसंघया कार्यविधि कथं अस्थायी रुपं त्यासाः बीगु व लिपा सरकारयात अनुदानया निंतिं लँपु चायेकीगु नं न्ह्यथनातःगु दु ।
