लोडसेडिङ हाकनं अप्वल आः न्हिइ झिंनिघौ

नेपाल विद्युत प्राधिकरणं कन्हय् निसें लागू जुइगु कथं लोडसेडिङया ई अप्वयेकूगु दु ।

प्राधिकरणं थ्वसिवें न्ह्यः कायम याःगु न्हिइ झिंछघौया लोडसेडिङया ई यात घौछि तना झिंनिघौ थ्यंकूगु दु । न्हूगु तालिका कथं आः वालय् चय्प्यघौ लोडसेडिङ जुइ । ग्राहस्थ क्षेत्रय् लोडसेडिङ सुथय् खुघौ व बहनी खुघौ जुइ । खुसिइ जलप्रवाह तच्वयेक म्हो जूगु व माग कथं विद्युत उत्पादनय् कमी जूगुलिं ई तनागु प्राधिकरणं धाःगु दु । प्राधिकरणं स्वीस्वंगु केभीए व झिंछगू कभीए पाखें आपूर्ति जुयाच्वंगु औद्योगिक क्षेत्रया हकय् धाःसा बहनी न्हय्ता ई निसें सुथय् च्याता ई तक लोडसेडिङ जुइगु धाःगु दु । मेगु औद्योगिक क्षेत्रय् धाःसा बहनी खुता इलंनिसें सुथय् खुता ई तक लोडसेडिङ जुइगु प्राधिकरणं धाःगु दु ।