पार्टीं निर्णय याःसा प्रम जुइत तयार: भट्टराई
येँ (सन्ध्या टाइम्स)/ एकीकृत माओवादीया उपाध्यक्ष डा. बाबुराम भट्टराईनं थःगु पार्टीं निर्णय यात धाःसा थः प्रधानमन्त्री जुइत तयार दु धयादीगु दु ।
'थ्व व्यक्तिगतसिबें नं पार्टीं याइगु निर्णय खः' वय्कलं म्हिगः बहनी भारतया मुम्बईलय् प्रेस क्लबं ग्वसाः ग्वःगु साक्षात्कार ज्याझ्वलय् न्ववासें धयादिल ।
वय्कलं आः न्हूगु प्रक्रियाय् वनाः सहमतिया सरकार दयेकेगु जूगुलिं उम्मेदवार जुइफइगु नं कनादिल। माओवादीया हे नेतृत्वय् राष्ट्रिय सहमतिया सरकार दयेकेगु व थःगु पार्टीं मेमेगु पार्टीया नेतृत्वय् दयेकीगु बहुमतीय सरकारयात स्वीकार याइ मखु धयादिल। प्रधानमन्त्री ल्ययेगु निंतिं यक्व हे कुतःत जूसां नं असफल जूगुलिं आः व्यक्ति व पार्टीसिबें नं च्वय् सहमतिया सरकार दयेकेमाःगु खँय् वय्कलं बः बियादिल ।
ज्याझ्वलय् माओवादी नेता डा. भट्टराईनं शान्ति प्रक्रिया पूवने मलायेकं हे राष्ट्र संघीय मिसन अनमिनयात लित छ्वयेगु गलत खः धकाः नं धयादिल ।
नेपाः व भारतया दथुइ सम्बन्ध बांलाना वयाच्वंगु खँ न्ह्यथँसें वय्कलं थःपिनि पार्टीं भारत व नेपाःया सम्बन्ध स्यंकेत स्वयाच्वंगु मदु धकाः नं दावी यानादिल ।
