अमेरिकां ग्वाहालि यानाच्वनीगु
येँ (सन्ध्या टाइम्स)/अमेरिकी सहायक विदेशमन्त्री रोबर्ट ब्लेकं प्रधानमन्त्री माधवकुमार नेपाल व एकीकृत माओवादी अध्यक्ष प्रचण्डयात फोन याना शान्ति प्रक्रियाय् अमेरिकाया ग्वाहालि निरन्तर दयाच्वनीगु आश्वासन बियादीगु दु। म्हिगः सनिलय् अमेरिकापाखें हे फोन यानाः वय्कलं फुक्क राजनीतिक दलयात वृहत शान्ति सम्झौता प्रतिया थःपिनि प्रतिबद्धतायात निरन्तर रुपं सम्मान यायत नं इनाप यानादीगु खः। 'शान्ति प्रक्रियायात माःकथं पूवंकेत नेपाःमि जनतां थःगु राजनीतिक नेतृत्वपाखें तःधंगु अपेक्षा यानाच्वंगु दु' अमेरिकी दूतावासया प्रवक्ता हिदर स्टाइलं सहायक मन्त्री ब्लेकं फोन यानाः उकथं बचं बियादीगु जानकारी यानादीगु खः ।
