थनिंनिसें पर्यटन वर्ष आरम्भ
येँ (सन्ध्या टाइम्स)/नेपाल पर्यटन बर्ष २०११ थनिंनिसें औपचारिक रुपं शुरु जुल। दशरथ रंगशालाय् थौं विशेष समारोहया दथुइ राष्ट्रपति डा. रामवरण यादवं पर्यटन बर्षया शुभारम्भ यानादीगु खः। थुगुसी १० लाख पर्यटक नेपाः दुकायेगु लक्ष्य सरकारं दयेकूगु दु। उगु समारोहय् उपराष्ट्रपति परमानन्द झा, प्रधानमन्त्री माधव नेपाल, सभामुख सुवासचन्द्र नेम्वाङ, माओवादी अध्यक्ष प्रचण्ड, एमालेया अध्यक्ष झलनाथ खनाल, नेपाली कांग्रेसया नेता रामचन्द्र पौडेल, मधेशवादी दलया नेतात, मन्त्रीत, उच्चपदस्थ ब्यक्तित्वपिनि उपस्थिति दुगु खः। व लसताय् येँया सर्गतय् प्याराग्लाइडिङ मार्फत ध्वाँय् ब्वयेकेगु ज्या याःगु दु। लसकुस न्वचु बिसें पर्यटन मन्त्री शरदसिंह भण्डारीं नेपालय् यक्व हे संभावना दुगु पर्यटन मार्फत आर्थिक क्रान्ति यायेफइगु दावी यानादिल। वय्कलं थ्व दँजःछि बन्द, हडताल, चक्काजाम मयायेत नं दलतय्त इनाप यानादिल। अथे हे प्रधानमन्त्री माधव नेपालं नेपालय् पर्यटनया तःधंगु संभावनायात उपयोग यायेगु लक्ष्य ज्वनाः पर्यटन वर्ष २०११ या घोषणा जूगु खः धयादिल ।
थ्वहे झ्वलय् थुगु लसताय् लाकाः थौं सुथय् ९ बजे ६,८१२ मिटर तजाःगु अमाडब्लम हिमालयय् गुम्हेसिया आरोहण पुचलं मत च्याकेगु ज्या याःगु खः ।
