सरकार व माओवादी दथुइ स्वंगू बुँदे सहमित

सरकार व एकीकृत नेकपा (माओवादी) दथुइ शान्ति प्रकृया व सेना समायोजन बारे स्वंगू बुँदे सहमति जूगु दु ।

नेपाः स्थित राष्ट्रसंघया राजनीतिक मिसन अनमिन लिहांवने छन्हु न्ह्यः सरकार व माओवादी दथुइ स्वंगू बुँदे सहमति जूगु खः । येँया होटल र्‍याडिसनय् जूगु सहलहलय् निगू पक्षं शान्ति प्रक्रियायात तार्किक निष्कर्षय् थ्यंकेत सहमति यानाःगु धाःगु दु ।

निगू पक्ष दथुइ जूगु सहमतिलय् अन्तरिम संविधान व थ्वस्वयां न्ह्यःया फुक्कं सम्झौता कार्यन्वयन यायेगु प्रतिबद्धता, सेना व ल्वाभः अनुगमनया निंतिं विशेष समिति अन्तरगत संयन्त्रयात जिम्मा बीगु व अनमिनयात सुभाय् देछासें बिदा बीगु न्ह्यथनातःगु दु ।

स्वंगू बुँदे सहमतिलय् सरकार पाखें प्रधानमन्त्री माधवकुमार नेपाल व माओवादी पाखें नायः पुष्पकमल दाहाल 'प्रचण्डं' ल्हाःचिं तयादीगु दु ।