न्हूगु प्रक्रियाया खँ थौं क्वःछीगु
येँ (सन्ध्या टाइम्स)/प्रधानमन्त्री निर्वाचन प्रक्रिया आः गुकथं न्ह्याकेगु धइगु बारे सहलह यायेत संसदया कार्यव्यवस्था परामर्श समितिया बैठक थौं सनिलय् च्वनीगु जूगु दु। कार्यब्यवस्थापन समितिया बैठक लिपा जक व्यवस्थापिका संसदया बैठक च्वनी ।
सभामुख सुभास नेम्वाङं जारी निर्वाचन प्रक्रिया समाप्त जूगुलिं माल धाःसा नियमावली संशोधन यानाः जूसां न्हूगु प्रक्रियाय् वनेगु जुइ धयादीगु दु। नियमावली संशोधन यानाः न्ह्याः वनेगु लाकि आःया हे नियमावलीया आधारय् वनेगु धइगु खँय् थौं संसदय् सहलह जुइगु ग्वसाः दु। धाःकथं नियमावली संशोधनया नितिं कार्यब्यवस्था समितिइ सहलह जुइ। संविधान व संसद्या नियमावलीइ तःक्वःमछि चुनाव जुयाः नं परिणाम मवःगु अवस्थाय् फुक्कसियां उम्मेदवारी लित काल धाःसा वयां लिपा छु जुइ धकाः छुं हे प्रावधान तया मतःगु कारणं आः कार्यव्यवस्थापन समितिइ सहलह यानाः न्हूगु लँपु लुइकीगु खँ धाःगु दु ।
