अनमिनया ज्या विशेष समितियात
येँ (सन्ध्या टाइम्स)/राष्ट्र संघीय मिसन अनमिन लिहां वनेधुंकाः माओवादी लडाकु व ल्वाभः रेखदेख, सेना समायोजन विशेष समिति मातहतया सचिवालयपाखें यायेगु धकाः सरकारं खँ क्वःछिउगु दु ।
कन्हय् तकया म्याद दुगु अनमिन लिहां वनेगु अन्तिम तयारी यानाच्वंगु दु। लडाकुया रेखदेख छु संयन्त्रं यायेगु धइगु विषयय् मूमू दलतय् दथुइ मतभेद जुयाच्वंगु हे अवस्थाय् थौं सुथय् मन्त्रिपरिषद्या बैठक च्वनाः उगु निर्णय याःगु खः ।
अनमिन मदइगु अवस्थाय् अनमिनं याना वयाच्वंगु ज्या सचिवालयपाखें यायेगु धकाः मन्त्रिपरिषदया निर्णय जूगु खँ अर्थमन्त्री सुरेन्द्र पाण्डें संचारकर्मीतय्त धयादीगु दु। 'माओवादी नेतृत्वया सरकारया इलय् हे यानातःगु निर्णययात जिमिसं सदर जक यानागु खः' मन्त्री पाण्डें धयादिल 'अनमिन लिपा विशेष समितिं फुक्क ज्या यइगु माओवादीया नेतृत्वया सरकारं हे निर्णय यानातःगु खः ।'
अनमिन वने धुंकाः अनमिनया ज्या यायेगु नितिं ब्यागलं कथंया संयन्त्र दयेकेमाः धकाः एकीकृत माओवादी व एमालेया शीर्ष नेतातय् दथुइ सहलह जुयाच्वंगु दुसा उगु हे खँयात कयाः स्वंगू दल दथुइ नं सहलह जुयाः अनमिनया ज्या यायेगु निंतिं छु याःसा जी धकाः प्रतिवेदन तयार यायेत छगू कार्यदल हे दयेकूगु खः ।
