जनबाहाद्यःया पाँय्म्वहः विमोचन

येँ (सन्ध्या टाइम्स)/जनबाहाः द्यःया न्हवं कुन्हु लाकाः म्हिगः जनबाहाः द्यःया किपा दुगु पाँय्म्वह पिकायेगु ज्या जुल। पाँय्म्वह पिथना पुचः-११३१ कनकचैत्य महाविहारया ग्वसालय् म्हिगः जूगु छगू ज्याझ्वःया दथुइ जनबाहाःया ज्याथपिं नागरिकपिनि ल्हातं उगु पाँय्म्वह विमोचनया ज्या जूगु खः। ज्याझ्वलय् मूपाहां कथं सर्वसंघया थकालि आनन्द शाक्य झाःगु खः ।

पाँय्म्वाः विमोचन न्ह्यः जनबाहाःया ज्याथःम्ह नागरिक कथं भाजु शाक्य (८२ दँ) लगायत त्वाःया थकालि श्रीरामनारायण कर्माचार्य (८५ दँ), त्वाःया जिथिम्ह नकिं लक्ष्मी कसाः (९७ दँ) व प्राणमाया कर्माचार्य (९३ दँ) पिंत हनेगु ज्या नं जूगु खः ।

उगु हे ज्याझ्वलय् वहःया पाँय्म्वह पिकायेगु ज्याय् आर्थिक ग्वाहालि यानादीपिं ४६ म्ह ग्वाहालिमि नापं मेमेपिं ग्वाहालिमिपिंत हनापौ लःल्हायेगु ज्या नं जूगु खः ।

छखे जनबाहाःद्यःया किपा व मेखे जनबाहाःद्यःया देगःया किपा अंकित यानातःगु उगु भिंगु वहःया पाँय्म्वह १५ ग्रामयागु खःसा उकिया मू १५०० तका तयातःगु दु। म्हिगःया ज्याझ्वलय् जक ४०० गः पाँय्म्वहः मिउगु खः। पाँय्म्वहः मियाः वःगु लबःया दां जनबाहालय् सरसफाई ज्याय् छ्यलीगु खँ धाःगु दु ।

पाँय्म्वहः पिथना पुचःया कजि विजय श्रेष्ठया सभापतित्वय् जूगु उगु ज्याझ्वलय् दुजः जिवेन्द्रलाल कर्माचार्यं लसकुस यानादीगु खःसा प्रवोध कसां सुभाय् देछायादीगु खः। म्हिगः उगु ज्याझ्वःया नापं जनबाहाःद्यःलिसे सम्बन्धित किपा ब्वज्या नं जूगु खः। उगु इलय् जनबाहाःद्यःया न्हवं, रथ यात्रा, रथ यात्राया झ्वलय् जूगु थीथी दुर्घटना, हलिमलि आदि नापं दुथ्याःगु पीपाः किपा ब्वयातःगु खः। किपा ब्वज्या छवाःयंकं न्ह्याइगु खँ ग्वसाः खलकं धाःगु दु ।

ज्याझ्वलय् जनबाहाः भजनपाखें भजन हालेगु ज्या नं जूगु खः ।