म्हय् मत च्याकाः धर्म
येँ (सन्ध्या टाइम्स)/जनबाहाः द्यःया न्हवंया लसताय् लाकाः वंगु मंगलवाः थःगु म्हय् ३६० प्वाः मत च्याकाः ग्वलया सीतादेवीं धर्मात्माय् दइगु शक्तिया प्रदर्शनी यानादीगु दु। वय्कःयात द्यःमांया नामं नं जनमानसं म्हसिउ। वय्कःपाखें न्हापा नं थज्याःगु ज्या जूगु दु ।
देशय् सकल प्राणीया भिं जुइमा धइगु कामना व देशय् शान्ति जुइमा धइगु भिंमति तयाः वय्कलं थ्व धार्मिक ज्या यानागु खँ कनादीगु दु ।
वय्कलं कनादी कथं जनबाहाः न्हवंया लसताय् वय्कलं यानादीगु थ्व २२ क्वःगु कुतः खः।
थुज्वःगु ज्या वय्कलं न्हापांखुसी सक्वया बज्रयोगिनीइ २०५९ साल माघ ४ गतेनिसें शुरु यानादीगु खः। वयां लिपा यलया कृष्ण मन्दिर, मनकामना, पशुपति लगायतया थासय् थुज्वःगु ज्या यायेधुंकूगु दु ।
अथे हे थःगु म्हय् नःलास्वां पीगु ज्या याइपिं मनूत नं मदुगु मखु। थःगु म्हय् नःलास्वां पीगु झ्वलय् १६ क्वः तक म्हय् नःलास्वां पीधुंकूपिं मनूत नं दु। थथे म्हय् मत तयेत नीसी यानाः द्यांलाना च्वनेगु याइ ।
