कक्षा काकां मंकाः चुडाकर्म
यल (सन्ध्या टाइम्स)/श्रीबहाःया श्रीबच्छ महाविहार सुधार समितिया ग्वसालय् नकतिनि हे मंकाः चूडाकर्म (प्रबज्या संवर) ज्याझ्वः नकतिनि हे क्वचाःगु दु। ज्याझ्वलय् चूडाकर्मया महत्व बारे लोटस रिसर्च सेन्टरया ग्वाहालिइ 'न्हिछियंक प्रशिक्षण' ज्याझ्वः नं न्ह्याकूगु खः ।
ज्याझ्वलय् चूडाकर्मया इतिहास व महत्वया विषयय् भद्ररत्न बज्राचार्यपाखें, चतुर आर्यसत्य, आर्य अष्टागिङ्ग मार्गया विषयय् सुरेन्द्रमान बज्राचार्यपाखें, पंचशील, अष्टशील व दशशीलया विषयय् गौतमवीर बज्राचार्यपाखें कक्षा संचालन यानादीगु खः। चूडाकर्म कार्यविधि, पूजा व हलंज्वलंया अर्थ व महत्वया बारे मणिष शाक्यं कक्षा कयादीगु खः ।
ज्याझ्वलय् मंकाः चूडाकर्म याःपिं मस्तय् पाजु, निनि, निनिपाजु, मां, बौ व इच्छुक भाजु मय्जुपिनिगु सहभागिता दुगु खःसा ज्याझ्वलय् श्रीबच्छ महाविहार सुधार समितिया नायः हेरारत्न शाक्यं लसकुस यानादीगु खः ।
