मेमेगु दलया नेतृत्वया बहुमतीय सरकार अस्वीकार्य : न्वकु भट्टराई
एकीकृत नेकपा -माओवादी) या न्वकु डा. बाबुराम भट्टराईं थःगु दलं मेमेगु पार्टीया नेतृत्वय् दयेकीगु बहुमतीय सरकार स्वीकार मयायेगु धयादीगु दु । भारतया मुम्बई शहर वनेन्ह्यः अन्तर्राष्ट्रिय विमानस्थलय् सञ्चारकःमिपिंलिसे खँल्हाबल्हा यानादिसें वय्कलं धयादिल - "जिमिगु पार्टीं सहमतिया सरकार दयेकीगु स्थितिइ जक मेमेगु दलया नेतृत्व स्वीकार याइ तर बहुमतीय सरकारया नितिं मेपिंत स्वीकार याइमखु ।"
उगु हे लसताय् न्वकु डा. भट्टराईं थः प्रधानमन्त्रीया प्रतिस्पर्धी मजुइगु नं स्पष्ट यानादिल । जिं न्हापांनिसें हे थःत प्रधानमन्त्रीया प्रतिस्पर्धी तायेकाःगु मदु, वय्कलं तनादिल - "प्रधानमन्त्रीया छगू मेचय् झिम्ह फयेतुइत स्वःगुलिं जक दच्छिनिसें राजनीतिक गतिरोध कायम जुयाः वयाच्वंगु खः ।"
न्वकु डा. भट्टराई मुम्बईसं अनुराधा गान्धी मेमोरियल लेक्चर नांया संस्थापाखें ग्वसाः ग्वःगु 'दि रोड टु न्यू डेमोक्रेसी इन नेपलिज् प्रोब्लम एण्ड च्यालेन्ज' विषयक गोष्ठीइ प्रमुख वक्ताया रुपं ब्वति कायेत उखेपाखे झायादीगु खः । भारतीय वामपन्थी नेत्री अनुराधा गान्धीया स्मृतिइ ग्वसाः ग्वइगु उगु ज्याझ्वलय् अनया थीथी वाम बुद्धिजीवीतय्सं नं ब्वति काइगु जानकारी ब्यूगु दु । वय्कः शनिबाः जक नेपाः देय् लिहां झाइगु ज्याझ्वः दु ।
