अमेरिकाया नजरय् नेपाः असुरक्षित

अमेरिकां नेपाः भ्रमणया झ्वलय् पिज्वयेफूगु ग्याःचिकुप्रति सचेत जुइत थःपिनि नागरिकतय्त इनाप याःगु दु । नेपाः भ्रमण दँया पूर्वसन्ध्याय् अमेरिकी विदेश मन्त्रालयं पिथंगु ट्राभल एडभाइजरीइ नेपाः अझ नं सुरक्षित गन्तब्य मजूसां नं थःपिनि नागरिकतय्त नेपाः भ्रमण यायेत प्रोत्साहन याःगु दु ।

निर्देशनय् नेपाःमि माओवादीतय्त अझ नं विशेष कथंया अन्तर्राष्ट्रिय आतङ्कवादी संगठनया सूचीइ तयातःगु न्ह्यःथनातःगु दु । माओवादीयात उगु सूचीपाखें चीकेगु प्रक्रिया न्ह्यायेधुंकूसां नं माओवादीयात अझ नं अमेरिकाय् दुहांवनेगुलिइ पनेफूगु व माओवादीयात लबः दइकथं अमेरिकापाखें प्राप्त जुइगु आर्थिक लिसे मेमेगु ग्वाहालि पनेफूगु नं विदेश मन्त्रालयपाखें जानकारी ब्यूगु दु ।