निगमयात संचय कोषं नं ध्यबा मबिल
येँ (सन्ध्या टाइम्स)/नेपाल वायु सेवा निगमं न्हूगु विमान न्याइगु सम्भावना मदयेवं उगु निगमयात कर्मचारी सञ्चय कोषं मालीमालीबलय् बीगु याना वयाच्वंगु त्यासा नं मबीगु जूगु दु। थौंकन्हय् दयेके यंकातःगु छगः विमानया इन्जिन काः वनेगु लागिं निगमं सञ्चय कोषयाके ध्यबा माल धकाः इनाप यानातःगु खः। उकुन्हु तक कोषं उगु दां काः वा धकाः थम्हं हे फोन याना हयाच्वंगु खःसां म्हिगः धाःसा ध्यबा काः वनं तकं आःयात निगमयात ध्यबा त्याय् बी फइ मखु धकाः लित छ्वया हःगु खँ सीदुगु दु। थुकिं यानाः निगमं थःगु दयेके यंका तःगु इन्जिन इलय् हयाः विमान ब्वयेके मखनीगु खँ नं सूत्रं धाःगु दु ।
थ्वहे झ्वलय् मेखे निगमया कार्यकारी अध्यक्ष सुगतरत्न कंसाकार निलम्बनय् लायेवं वय्कःया थासय् वःम्ह महाप्रवन्धक के.बी. लिम्बुं दुहां वःगु निवाः हे मदुनिवं निगम दुने व्यापक रुपं सरुवा बढुवा शुरु याःगु दु। लिम्बुं निगमयात न्हूगु विमान म्वाः धाइपिं मनूत धाक्वसित प्रवन्धक पदय् बढुवा याःगु खँ सूत्रं धाःगु दु ।
थुकिया नापनापं लिम्बुं निगमया निलम्बित कार्यकारी अध्यक्ष सुगतरत्नलिसे मुद्दा ल्वायेत पिनेयापिं न्याम्ह वकिलत छ्यलेगु तयारी यानाच्वंगु खँ नं सीदुगु दु। तर निगमं स्वम्ह वकिलतय्त थःपिंसं हे कर्मचारी कथं लहिना तःगु दुगुलिं पिनें वकिल हयेगु धइगु गैरकानुनी जुइगु दावी सूत्रं याःगु दु ।
पिनें वःपिं वकिलतय्सं नं मुद्दा ल्वाये न्ह्यः हे एडभान्स माः धकाः माग याःगुलिं लिम्बुयात मछिंगु खँ धाःगु दु। छुं जुयाः थ्व मुद्दा बुत धाःसा सुगतरत्न कंसाकार हानं निगमय् दुहां वइगु व वय्कलं थःपिनि ध्यबा बी मखु धकाः वकिलतय्सं न्हापां एडभान्स माग याःगु खः। तर निगमया लेखा शाखां धाःसा न्हापां ज्या या, वयां लिपा बिल पेश या अले जक ध्यबा बीगु निगमया चलन खः धकाः एडभान्स दां मबिउगु खँ धाःगु दु ।
