चिकुगु अप्वःगुलिं तराईया सतक न्हिनय् हे सुनसान

येँ (सन्ध्या टाइम्स)/ख्वातुगु खसु व शितलहरं प्रभावित जूगु तराई लागा थौंकन्हय् सनिलय् जुल कि हे सुनसान जुइगु जुयाच्वंगु दु। तसकं चिकुगुलिं मनूत याकनं हे पसःपिसः तिनाः छेँय् वनीगु जूगुलिं न्हिनय् हे सतक सुनसान जुइगु खः ।

तराई लागाय् थुगुसी जक चिकुयाः ४० म्ह मनूया ज्यान वनेधुंकूगु दु। खसुं छुं हे खने मदुगुलिं लँय् यातायात चले जुयाच्वंगु मदुसा स्कूल कलेज नं बन्द यायेधुंकूगु दु।
पिने तसकं ख्वाउँसे च्वंगुलिं स्थानीय प्रहरीं सतकया दुवाः दुवातय् मि च्याकाः मनूतय्त मि कुनेगु व्यवस्था यानातःगु दु ।

उखे चिकुगु अप्वःगुलिं खास यानाः ५ दँ स्वयां क्वय्यापिं व ६० दँ स्वयां च्वय्यापिं मनूत सतर्क जुइत स्थानीय डाक्टरतय्सं सल्लाह बिउगु दु। फयांफछि मनूत खसुइ पिहां मवयेत व क्वाःलः लगायत क्वाःक्वाःगु ज्वलं जक अप्वः नयेत नं उमिसं सुझाव बिउगु दु ।

मेखे चिकुगु अप्वयाः तराईया बुँइ पिनातःगु आलु, प्याजया मा नं प्रभावित जूगु दु। माय् दाःगु की स्यायेत वासः छ्वाकः वनेगु तकं अवस्था मदुगु खँ धाःगु दु ।