धर्मकीर्तिया झिक्वःगु प्रव्रज्या शिविर
यल (सन्ध्या टाइम्स)/धर्मकीर्ति बौद्ध अध्ययन गोष्ठीया ग्वसालय् सुनागुथिया जनविहारय् झिंछक्वःगु अल्पकालनी प्रव्रज्या शिविर जुल। उगु शिविरय् झिदँनिसें झिंच्यादँ दुपिं पीस्वम्ह मस्तय्सं ब्वति काःगु खः ।
शिविरय् ब्वति काःपिं मध्ये झिंप्यम्ह श्रामणेर, छम्ह अनगारिका व नीन्हय्म्ह ऋषिनी जूगु खः। शिविर ज्वछि ब्वति झ्फ्काःपिं मस्तय्त बुद्धपूजा, ध्यान, बुद्ध धर्मया कक्षालिसें चित्रकला, कार्यक्रम उद्घोषण तालिम, स्वास्थ्य सम्बन्धी कक्षा, न्ह्यसःलिसः कासा नं म्हितकेगु ज्या जूगु खः। उगु शिविर संचालन जुयाच्वंगु इलय् विपश्यना केन्द्रया निर्देशनय् बौद्ध महिला संघपाखें छन्हुया ध्यान शिविर नं याःगु खः ।
भिक्षु अश्वघोष महास्थवीर मूपाहां कथं बिज्याःगु उगु शिविरया समापन ज्याझ्वः शिविरय् वःपिं मस्तपाखें हे संचालन याःगु खः। शिविरया मू संयोजक इन्दावती गुरुमां, संयोजकपिं मीना तुलाधर, अमीरकुमारी शाक्य व रमा कंसाकारपिंत लुमंति चिं लःल्हाःगु खः। शिविर संचालनय् ग्वाहालि यानादीम्ह बौद्ध जनविहार कमिटीया अध्यक्ष तुलसीलाल महर्जन व स्वयंसेवक जूपिं उपासक उपासिकापिंत नं लुमंति चिं लःल्हाःगु खः ।
